Seccion di Remedi

Bo a trece remedinan y/of suplementonan ('zelfstandigheid') cu ta pa uzo propio a wordo deteni na aeropuerto y/of postkantoor? E ora bo mester permiso di IVA pa por importa e productonan aki door di yena e formulario 'Aanvraag Invoervergunning Zelfstandigheden voor Eigen Gebruik'. Entrante 5 di mei 2025, e proceso aki lo ta completamente digital. Akinan por haya e link pa e formularionan digital. 

Por fabor tene na cuenta cu e pakinan di remedi cu ta wordo evalua, por ta solamente den e siguiente idiomanan: Hulandes, Spaño, Ingles, Papiamento. Pues no ta acepta paki di remedi y/of suplemento cu ta den un otro idioma.

Ora di yena e formulario di declaracion online, mester upload e siguiente documentonan:

1. E documento di aduana
2. ID valido (paspoort/rijbewijs/carnet di ID)
3. Un potret/copia di descripcion di e ingredientenan si ta trata suplemento (hopi biaha aduana mes ta manda esaki pa IVA)
4. Un potret/copia di e receta di dokter si ta trata remedi

Ta importante pa tene e siguiente puntonan na cuenta:

• si acaso bo a haci un pedido di un 'zelfstandigheid' online via un compania di cargo manera por ehempel FEDEX, DHL, Fast Delivery, cu e ora e compania di cargo mes lo mester entrega e documentonan necesario na IVA pa por saca e productonan pa su cliente.
• Pa remedinan riba receta, en principio lo por haya permiso pa importa un cantidad ekivalente na 3 luna di uzo.
• Otro remedinan cu no ta wordo prescribi pa un dokter lo wordo limita na un cantidad cu ta ekivalente na 6 luna di uzo.

Pa importa productonan manera suplemento, cosmetica y remedi alternativa manera remedi homeopatico pa uzo comercial, ta rekeri un permiso.

IVA ta rekeri e siguiente documentonan pa evalua e peticion di un 'zelfstandigheid' pa uzo comercial:

1. Un peticion por escrito cu kier importa un zelfstandigheid/zelfstandigheden pa uzo comercial dirigi na e Inspectora di Remedi, sra. Roselynn Angela;
2. Un muestra di e zelfstandigheid (cu bijsluiter si ta aplicabel) den e pakete original manera esaki ta wordo bendi;
3. Un copia di e etiket y/of art work riba un A4. Esaki mester ta identico na e exemplar cu a wordo entrega;
4. E checklist yena pa controla cu tur documentonan rekeri a wordo entrega
   
   Si ta aplicabel mester e siguiente documentonan tambe (IVA mes lo tuma contact cu bo si acaso mester di e documento aki):
5. Un Certificate of Free Sale (prueba cu e zelfstandigheid/zelfstandigheden ta bou control di autoridadnan den e pais di e producto su origin);
6. Un prueba di Good Manufacturing Practice Certificate di e fabrica;

E documentonan menciona akiriba mester manda via email na: inspectiegeneesmiddelen@iva.aw. Un funcionario di e seccion di IVA lo tuma contacto cu cu e cliente via mail pa traha un cita pa entrega e muestra y e art work na nos oficina. Pues, no tin inloop. 

E proceso y rekesitonan ora di evalua bo productonan na IVA por lesa den e documento akinan. E documento ta inclui e lista di chekeo menciona den punto 4 akiriba cu mester entrega hunto cu e documentonan rekeri.

Pa por habri un botica, mester tin un permiso valido otorga pa IVA. Pa mas informacion tocante e procedura aki, por tuma contacto cu nos.

Tur asistente di boticario mester ta inscribi na IVA prome cu nan por eherce nan profesion. Pa mas informacion tocante e proceso di registracion, por tuma contacto cu nos. 

Door di e conocimento specialisa di remedi y kimico, IVA ta e organisacion responsabel pa destrui remedi na Aruba. Instancianan cu ta haci uzo di e servicio aki ta por ehempel: botica, importado di remedi, aduana, compania di cargo, instancia di cuido, scol, laboratorio.

Remedi y kimico cu ta wordo destrui ta por ehempel esunnan cu:

• a caduca na botica, companianan di importacion, scolnan, laboratorio of otro companianan cu tin e autorisacion pa uzo of bende remedi y/of kimico;
• a wordo confisca di door di aduana;
• a wordo confisca ora ta trata accionnan ilegal;
• a wordo saca for di mercado (recall);
• a wordo uza como muestra na e Comision di Registracion y na e Seccion di Evaluacion;
• a yega cu daño cerca companianan di importacion 

Proceso pa entrega peticion pa destruccion

E destruccion di remedi y/of kimico ta wordo haci riba peticion di un persona cu ta den posesion di un remedi y/of kimico. Destruccion di remedi y/of kimico ta tuma luga 6 biaha pa aña den lunanan di januari, maart, mei, juli, september y november. Peticionnan por wordo manda na info@iva.aw.  

Peticion pa destruccion durante un di e lunanan menciona akiriba mester wordo entrega no mas tarda cu e prome di cada luna den cual e destruccion mester tuma luga. Por ehempel, si entrega un peticion pa destrui remedi y/of kimico den luna di januari, e peticion mester wordo entrega no mas tarda cu 1 di januari. 

E peticion mester inclui lo siguiente:

• nomber di e remedi y/of kimico cu mester wordo destrui;
• e cantidad;
• razon cu e remedi y/of kimico mester wordo destrui;
• peticionnan mester wordo entrega cu postzegel cu un balor di Afl. 100,- florin (obtenibel na postkantoor) of un lege cu un balor di Afl. 100,- (obtenibel na Directie Volksgezondheid Aruba).

E relato di maneho pa loke ta destruccion di remedi y kimico por haya akinan.