Importa remedi pa uzo comercial

Companianan cu ta desea di importa suplementonan of remedinan homeopatico pa uzo comercial mester ta tene na cuenta cu un producto por wordo clasifica como un remedi bou di leynan y regulacionnan di Aruba. Prome cu por bende e producto riba mercado di Aruba, mester entrega un muestra (monster) na IVA pa evaluacion. Un muestra ta necesario pa evaluacion di productonan cu no a ricibi autorisacion, registracion of un permiso previo ainda.

Ken tur por entrega un muestra pa evaluacion?

E siguiente entidadnan por entrega un muestra pa evaluacion: 

  • Importadonan di remedi
  • Importadonan di suplemento
  • Boticanan publico

Peticionnan mag di wordo entrega pa productonan cu un etiket den un idioma stranhero?

No, solamente productonan den Papiamento, Hulandes, Ingles y Spaño lo wordo evalua door di IVA.

Den cuanto tempo mi peticion ta wordo procesa?

E promedio di tempo pa procesa un peticion ta cuater (4) siman despues cu nos a ricibi y registra un peticion. 

Con e proceso ta cana?

E stapnan den e proceso ta wordo splica akibou.

Stap 1. Yena e formulario digital

Mester yena e formulario digital ‘Verzoek Monster ter Evaluatie’. Tur peticion ta wordo registra y procesa riba dialuna. Ora di yena e formulario, bo mester tin e siguiente informacion/documentonan disponibel pa 'upload' (den formato PDF/PNG/JPEG):

  1. Un potret di color di e muestra of e etiket fisico. E potret/etiket y e pakete mester ta:  
    - Di colo;
    - Cla y lesabel;
    - Mustra tur banda di e producto, incluyendo e barcode;
    - Na Spaño, Ingles, Hulandes of Papiamento
    - Cuadra cu e pakete di e muestra.
  2. Copia di e Good Manufacturing Practice Certificate (GMP-certificate) si e producto no ta di Europa, Merca of Canada.
  3. Si ta trata di un compania nobo y esaki ta bo prome peticion, bo mester tin e siguiente informacion disponibel tambe:  
    - Emailadres di e persona di contacto;
    - Persoonsnummer;
    - KVK-nummer;
    - Copia di e uittreksel di Camera di Comercio (KVK)
Tuma nota: si bo falta e informacion y/of documentonan menciona akiriba, bo peticion no ta completo y no lo wordo procesa.

Despues cu bo a entrega bo formulario, bo lo ricibi un confirmacion automatico cu nos a ricibi bo peticion. E email aki ta contene bo 'zaaknummer'. Pa cada producto cu bo a entrega un peticion, bo lo ricibi un 'zaaknummer'. Bo mester uza e number aki pa comunica cu IVA tocante bo peticion.

Stap 2. Carta di aceptacion

Despues cu nos a ricibi bo formulario digital, nos lo registra y controla bo peticion. Si e peticion ta completo cu tur documento rekeri, nos lo procesa bo peticion dentro di 3 dia di trabou y lo bo ricibi un carta di aceptacion via e-mail cu un fecha pa un cita pa entrega bo muestra(nan) na IVA. Bo mester print bo carta di aceptacion y entrega esaki hunto cu bo muestra(nan). Si bo ta desea un prueba cu bo a entrega bo muestra, lo bo mester trece un copia di e carta di aceptacion na IVA pa nos por firma esaki.

Stap 3. Entrega e muestra(nan)

Bo por entrega bo muestra(nan) solamente cu un cita. Pues nos no ta acepta walk-ins. E fecha y orario di bo cita ta para riba e carta di aceptacion cu bo a ricibi di IVA via e-mail. Na momento di entrega bo muestra(nan), un empleado di IVA lo controla si bo a entrega tur muestra. Si tur cos ta completo, bo carta di aceptacion lo wordo firma cu e fecha di entrega. Despues cu IVA a toets bo productonan, lo nos informa bo di e decision via e-mail.

Stap 4. Decision

Na momento cu IVA a toets bo producto(nan) pa determina si e ta un remedi, bo lo ricibi un carta via e-mail cu e decision di IVA. Bo por ricibi un di e siguiente decisionnan:

  • E producto no ta un remedi y por wordo importa libremente. 

    Despues di ricibi e decision, bo tin un (1) siman pa busca e muestra cu bo a entrega na IVA. Si e muestra no wordo busca dentro di un siman, e lo wordo destrui.

  • E producto ta un remedi y no ta autorisa pa importacion.

       E muestra cu bo a entrega na IVA lo wordo destrui.  

  • E peticion lo no wordo procesa pa motibo cu no a cumpli cu tur rekesito ora di entrega e peticion (wak stap 1 pa e rekesitonan);
  • E producto no ta cay bou di e competencia (vakgebied) di IVA y no por wordo getoetst;
  • E producto no ta un remedi, pero a wordo transferi pa un otro departamento di IVA.

Pa evita retraso den proceso, ta importante pa bo tin tur documento necesario na man, manera por ehempel e GMP-certifcate di e fabricante.

Primi riba e link akibou pa entrega un peticion pa evaluacion di un muestra:

Formulario evaluacion di muestra

Bo tin pregunta tocante e proceso aki? Tuma contacto cu nos telefonicamente of via: inspectiegeneesmiddelen@iva.aw