Tareanan

Inspeccion di Salud Aruba (IVA) ta monitoria cuido di salud na Aruba na un manera independiente. IVA tin e tarea importante di supervisa dunadonan di cuido y di enforsa leynan di cuido. Tambe IVA ta duna conseho na e veld di cuido pa salvaguardia e calidad di cuido duna na Aruba. IVA ta forma parti di e ministerio di Turismo, Salud Publico y Deporte. E tareanan di IVA ta describi akibou.

Informa

Pa IVA transparencia ta hopi importante. Esaki ta nifica cu informa pashent ta forma un parti grandi di nos organisacion. Nos ta informa pashent di nan derechonan y debernan y ta tene pashent na altura di desaroyonan y sondeonan haci den cuido na Aruba.

Monitoria

Como supervisor IVA ta monitoria tur dunadonan di cuido y instancianan di cuido na Aruba. Pues, IVA ta monitoria e calidad di cuido cu ta wordo duna y con dunadonan di cuido ta trata cu kehonan di pashent.

Controla

IVA ta supervisa a base di diferente ordenansa den cuido, por ehempel e Ordenansa Nacional di Calidad di Cuido (Landsverordening kwaliteit in de gezondheidszorg) y Ordenansa Profesionnan den Cuido (Landsverordening Beroepen in de gezondheidszorg).

Tratamento di kehonan y/of notificacionnan

IVA ta trata calamidad, ta registra keho y ta guia pashent ora di entrega un keho of notificacion. Tambe IVA ta controla si dunadonan di cuido en berdad ta trata kehonan cu nan ta ricibi. Dunadonan di cuido ta keda primordialmente responsabel pa e cuido cu nan ta duna, pero ora ta necesario, IVA ta tuma accion inmediatamente riba kehonan y/of notificacionnan ricibi. Por ehempel, ora tin un peliger inmediato pa e pashent.