Proceso di keho

Ki ora mi por acudi na seccion Meldpunt IVA?

Por acudi na seccion Meldpunt ora bo tin pregunta tocante cuido of ora bo kier entrega un notificacion of un keho tocante cuido medico na Aruba. Aki na Aruba, tur pashent y cliente tin e derecho pa entrega un keho ora nan no ta satisfecho cu e cuido of servicio ricibi. Esaki ta conforme e Ordenansa Nacional Calidad di Cuido Medico (AB 2014 no. 74). Meldpunt IVA su obhetivo ta pa ta un punto di acceso unda clientenan por acudi cu pregunta, notificacionnan y/of kehonan tocante e calidad di cuido ricibi. Seccion Meldpunt ta registra bo notificacion of keho, ta informa y guia clientenan y ta controla si e proceso di tratamento di keho ta bay na un manera profesional y eficiente. Informacion cu ta bin for di e registracion di keho y notificacionnan, ta yuda IVA pa identifica tendencia y areanan di mehoransa den e sistema di cuido medico. Ademas, kehonan di e trabou di IVA mes (por ehempel con nos ta atende cu cliente, e manera di ehecuta un bishita di inspeccion, etc.) tambe por wordo entrega na seccion Meldpunt. 

Kico ta e diferencia entre un notificacion y un keho?

Un notificacion (señal) por wordo haci ora bo kier notifica Inspectie cu tin un situacion di (posibel) riesgo den un instancia cu ta duna cuido of di un dunado di cuido. Esaki ta wordo mira y registra como un señal, pero e no ta un keho formal. 

Un keho por wordo entrega ora bo ta sinti bo a wordo perhudica of bo derecho no a wordo respeta. E ta e caminda formal cu bo por cana ora cu bo ta desea un respuesta formal di e instancia of persona cu bo ta entregando un keho contra di dje. Bo keho ta bira oficial na momento cu bo pone esaki por escrito y present'e na bo dunado di cuido. Tin e opcion di entrega e keho na IVA tambe y den e caso aki nos lo tuma bo keho den tratamento sigun nos procedura di keho. 

Un notificacion y un keho por wordo haci den un forma anonimo tambe na Inspectie.

Con mi por haci un pregunta of entrega un notificacion y/of keho? 

Pa notificacion of pregunta

Bo por entrega un notificacion of haci pregunta na diferente manera: telefonicamente, email, of via whatsapp. Si ta desea, por deposita un notificacion por escrito tambe den e brievenbus di IVA.

Pa keho

Bo por uza e link aki pa yena e formulario digital di keho di Meldpunt IVA. Nos ta prefera ricibi keho via e formulario online, pa nos por registra e caso completo y trata esaki mas eficiente cu ta posibel. Nos kier haci e proceso di entrega keho mas facil cu ta posibel pa e demandante. Pa e motibo ey bo tin e opcion di yena tur informacion di bo keho riba e formulario digital óf bo por upload un carta di keho na e formulario digital si bo tin un carta traha caba.

Dependiendo di e informacion cu bo duna, Meldpunt IVA por invita bo pa un cita pa bo splica mas di e sucedido. Ora ta trata di un posibel calamidad den cuido, por ehempel un situacion serio cu a causa daño grave na un pashent, e notificacion lo wordo manda pa e Inspector(a) di Salubridad.

Si bo tin pregunta tocante entregamento di un keho of otro pregunta relata na un keho, bo por semper tuma contacto cu Meldpunt IVA. Esaki por telefonicamente, via email of via whatsapp.

Kico seccion Meldpunt IVA ta haci cu un keho?

Seccion Meldpunt en principio no ta resolve keho, pero ta informa ciudadanonan di e pasonan cu nan por tuma. Den e Ordenansa Nacional Calidad di Cuido Medico (AB 2014 no. 74), particularmente articulonan 3 y 9 te 13,  tin poni cu e dunado di cuido mes tin e obligacion pa tin un maneho di keho y pa trata kehonan cu nan ta ricibi di nan pashent. Pa es motibo IVA ta conseha tur persona pa entrega un keho directamente cerca e dunado di cuido mes prome. 

Den e caso cu e dunado di cuido no atende cu bo keho of si bo no ta contento con e keho a wordo trata, bo por entrega un keho na IVA via seccion di Meldpunt unda cu nos lo trata e keho sigun nos procedura di keho. Ora un keho wordo entrega oficialmente, Meldpunt IVA ta informa e dunado di cuido di e keho cu a wordo entrega y cu e tin 6 siman pa trata e keho y responde na bo (e demandante) por escrito. E dunado di cuido mag pidi pa e tratamento di e keho wordo extendi cu 4 siman. Esey kiermen cu un tratamento di un keho oficial por dura un maximo di 10 siman. 

Kico ta e procedura di tratamento di un keho na IVA?

E proceso di keho ta wordo splica akibou:

1. Despues cu Meldpunt IVA ricibi bo keho por escrito via nos formulario digital, e funcionario di Meldpunt ta controla si tur informacion riba e formulario a wordo yena. Si e informacion ta completo, bo keho ta bay den e proceso di keho. Si e informacion no ta completo, e funcionario di Meldpunt lo tuma contacto cubo pa adkeri e informacion adicional cu falta. Nos ta prefera ricibi keho via e formulario online, pa nos por trata esaki mas eficiente cu ta posibel. Pues, no mester pasa oficina personalmente pa entrega un keho.
2. E funcionario di Meldpunt ta manda un carta na e dunado di cuido cu e nomber y informacion di contacto di e demandante y e carta di keho. Na momento cu e dunado di cuido ricibi e carta di IVA, e periodo den cual e keho mester wordo trata ta cuminsa cana. Segun ley, e dunado di cuido mes ta responsabel pa trata e keho. IVA ta vigila e proceso di keho y si e keho ta wordo trata dentro e periodo rekeri.
3. Conforme e Ordenansa Nacional Calidad di Cuido, e demandante mester ricibi un contesta di e dunado di cuido dentro di 6 siman. Si pa un motibo imprevisto e dunado di cuido mester mas tempo, e periodo por wordo extendi cu maximo cuater (4) siman mas. Den e caso aki, e dunado di cuido mester notifica e demandante por escrito di e atraso y e motibo. En total, e periodo pa trata e keho por dura un maximo di dies (10) siman.
4. E dunado di cuido mester informa e funcionario di Meldpunt ora e keho a wordo trata y con esaki a wordo haci (por ehempel via un copia di e carta cu nan a manda pa e demandante). Banda di esaki, e demandante mes por informa e Meldpunt IVA ora cu e ricibi un reacion di e dunado di cuido. 

Kico ta pasa ora mi entrega un notificacion of keho anonimo?

Un notificacion y un keho por wordo entrega den un manera anonimo. Esaki ta nifica cu IVA ta wordo poni na altura di e situacion, pero sin sa ken ta entregando e notificacion of keho. Den e caso aki, e notificacion anonimo lo wordo registra y, dependiendo di e situacion cu nos a wordo notifica di dje, IVA lo evalua ki pasonan lo por wordo tuma.

Ora cu entrega un notificacion of keho anonimo, ta importante pa tene cuenta cu e siguiente puntonan:

• Inspectie no por tuma contacto cu bo pa pidi mas aclaracion;

• Inspectie no por mantene bo na altura di e paso(nan) siguiente;

• Den caso di un keho, no semper por sigui tur paso formal cu ley ta duna si nos no tin bo datonan.

Con mi por duna IVA feedback of entrega un keho di IVA mes?

Na IVA nos ta haya importante pa keda mehora nos servicionan continuamente. Si acaso bo no ta satisfecho cu por ehempel, e trato di IVA, con un inspeccion a wordo haci, of cu e modonan y/of e manera di comunicacion di IVA, bo por duna feedback of entrega un keho. Riba e pagina “Feedback pa IVA”, bo por lesa e procedura con pa haci esaki. 

Informacion di contacto Meldpunt IVA

Inspectie Volksgezondheid Aruba
Seccion Meldpunt IVA
Adres: Schotlandstraat 45, Oranjestad Aruba

Email: meldpunt@iva.aw
Telefon: +(297) 526 2166
Whatsapp: +297 593 6373