Trece remedi y/of suplemento pa uzo propio
Bo remedinan y/of suplementonan ('zelfstandigheid') cu ta pa uzo propio a wordo deteni na aeropuerto y/of postkantoor? E ora bo mester permiso di IVA pa por importa e productonan aki door di yena e formulario 'Aanvraag Invoervergunning Zelfstandigheden voor Eigen Gebruik'. Entrante 5 di mei 2025, e proceso aki lo ta completamente digital. Akibou por haya e link pa e formularionan digital.
Por fabor tene na cuenta cu e pakinan di remedi y suplemento cu ta wordo evalua, por ta solamente den e siguiente idiomanan: Hulandes, Spaño, Ingles, Papiamento. Pues no ta acepta paki di remedi cu ta den un otro idioma.
Remedinan Narcotico
Bo remedinan ta cay bou di remedinan narcotico? Pa esaki tin un otro proceso y formulario. Por haya mas informacion y e formulario digital akinan.
Pa remedi y/of suplemento treci via aeropuerto:
Formulario import via aeropuerto
Pa remedi y/of suplemento treci via postkantoor:
Ora di yena e formulario di declaracion online, mester upload e siguiente documentonan:
- E documento di aduana
- ID valido (paspoort/rijbewijs/carnet di ID)
- Un potret/copia di e pakete cu un descripcion di e remedi of suplemento
- Si ta trata un remedi riba receta durante un tratamento medico den exterior mester entrega:
- Un potrèt/copia di un receta medico firma pa un dokter tratante autorisa den exterior. Riba e receta mester tin e nomber completo di e pashent.
- E receta no por tin mas cu shete (7) dia bieu despues di e fecha di regreso na Aruba
- Pa remedinan cu ta wordo administra pa medio di inyeccion of infuus, ta rekeri un declaracion di un dokter autorisa na Aruba, hunto cu e historia medico di e pashent.
- Si ta trata un turista cu ta bishita Aruba temporalmente e lo mester trece un declaracion medico cu ta duna un resumen di e remedinan cu a keda prescribi na dje.
Ta importante pa tene e siguiente puntonan na cuenta:
- si acaso bo a haci un pedido di un 'zelfstandigheid' online via un compania di cargo manera por ehempel FEDEX, DHL, Fast Delivery, cu e ora e compania di cargo mes lo mester entrega e documentonan necesario na IVA pa por saca e productonan pa su cliente.
- Pa remedinan riba receta, en principio lo por haya permiso pa importa un cantidad ekivalente na 3 luna di uzo.
- Pa suplementonan, lo por haya permiso pa importa un cantidad ekivalente na 3 luna di uzo.
- Otro remedinan cu no ta wordo prescribi pa un dokter lo wordo limita na un cantidad cu ta ekivalente na 6 luna di uzo.