Riba diaranson 13 di september 2023, e Instituto di Briljante Mislukkingen a organisa nan di nuebe edicion di e "Briljante Mislukkingen Award' na Leiden, unda Inspectie Volksgezondheid Aruba (IVA) a sali ganado. E reconocimiento aki ta demonstra nos dedicacion como organisacion pa siña di tur experiencia. Tabata tin cuatro otro nominado den cuido na Hulanda. E competencia aki ta wordo sosteni door di e Ministerio di Salud, Bienestar y Deporte di Hulanda (VWS) y ZonMw, cu ta e organisacion Hulandes pa sondeo di salud y innovacion den cuido.

Kico ta un 'briljante mislukking'? Un 'briljante mislukking' ta trata un intento pa realisa un proyecto, pero cu apesar di a planea y prepara esaki bon, toch no tin e resultado premira. Pues un 'briljante mislukking' ta ora cu por siña, a base di patronchinan di fayo, pa den futuro ta mas exitoso. Y tambe comparti e experiencia aki cu otro. Asina otronan tambe por refleha y siña di e experiencia aki. E Instituto di Briljante Mislukkingen a wordo funda door di Professor Dr. Paul Iske na 2010.

Durante e Quality of Healthcare Conference na november 2022 pa tur dunadonan di cuido, IVA a introduci e idea di Briljante Mislukkingen aki na Aruba. Prof. Dr. Paul Iske a duna un presentacion durante e conferencia aki. Prof. Dr. Paul Iske ta ‘hoogleraar Open Innovation & Business Venturing’ na e ‘School of Business and Economics’ na Universidad di Maastricht, Hulanda. Na IVA nos ta kere den mehoracion y innovacion den e sistema di salud y esey ta nifica tambe cu ta esencial pa siña di erornan, pa ta mas exitoso den futuro. Esaki ta un pensamento esencial pa dunadonan di cuido tambe, pa hunto por mehora servicionan continuamente pa e bienestar y siguridad di e pashent.

E motibo cu IVA a participa den e competencia aki ta pa 'lead by example'. IVA kier inspira e sector di cuido na Aruba pa reconose e balor di e ‘lessons shared’ pa cu e calidad di cuido. Inspectora General, Sra. Dorylee Pappers–Lopez Penha, ta comenta: “Aunke cu exito den proyectonan semper ta e meta, ta di importancia igual pa reconoce e lesnan cu nos ta siña for di proyectonan cu no a bay manera planea inicialmente. Door di comparti e momentonan di reto y crecemento durante un proyecto asina, ta crea sabiduria colectivo pa logra tur meta den sector di cuido”.

Pa lesa e relato oficial di e Instituto di Briljante Mislukkingen, por bishita:  https://www.briljantemislukkingen.nl/zorgaward23/

Briljante Mislukking Awards Zorg 2023