Importa productonan cu CBD

Companianan cu kier importa y distribui remedi cu CBD cu tin un contenido di THC di maximo 0,2% na Aruba, mester pidi pa un permiso pa por importa esaki.
Productonan cu CBD cu tin un contenido di THC di maximo 0,2% ta wordo considera como remedi segun e Regulacion Ministerial (Ministeriële Regeling) di 2019 (No. 82). Pa e motibo ey, e productonan aki por wordo importa, warda y distribui solamente si un permiso a wordo otorga pa esaki door di e Minister di Salud Publico. Un permiso ta garantisa cu solamente productonan sigur y di bon calidad, cu ta cumpli cu e rekisitonan legal, por wordo admiti riba mercado Arubiano.
E peticion pa e permiso mester wordo entrega na e Minister di Salud Publico. IVA lo evalua si e solicitante y e productonan ta cumpli cu e rekisitonan legal vigente, e normanan di calidad y e condicionnan di siguridad. Basa riba e evaluacion aki, IVA lo duna conseho na minister cu despues lo tuma un decision tocante e peticion.
Riba e pagina aki bo por haña informacion tocante e procedura pa pidi un permiso pa e importacion, wardamento y distribucion di remedi cu CBD cu tin un contenido di THC di maximo 0,2%.
Bo por download e maneho completo akinan unda por haya informacion di e rekesitonan legal pa warda y distribui e productonan aki. Riba pagina 13 di e maneho tin un checklist pa verifica e documentonan cu mester wordo entrega hunto cu e peticion pa permiso.
Con e proceso ta cana?
Ora un peticion wordo ricibi, e ta pasa varios stap di evaluacion consecutivo. E meta di e procedura aki ta pa determina si e solicitante ta cumpli cu e rekisitonan legal aplicabel y e normanan di calidad pa importa, warda y distribui productonan cu CBD. E proceso di e peticion ta wordo splica akibou.
Stap 1. Entrega di e peticion
E peticion mester wordo entrega na e minister encarga cu Salud Publico. E minister ta manda e peticion pa IVA pa conseho.
Stap 2. Peticion pa documentonan
IVA ta pidi e solicitante pa entrega e documentonan y datonan rekeri pa un prome evaluacion di e peticion. E documentonan rekeri por wordo entrega fisicamente na oficina di IVA of digitalmente via e-mail na: inspectiegeneesmiddelen@iva.aw
Stap 3. Evaluacion di documentonan
IVA ta evalua e documentonan cu a wordo entrega segun e leynan y regulacionnan aplicabel, y e guianan di calidad relevante. Riba pagina 13 di e maneho 'Vergunning voor de invoer van CBD-geneesmiddelen met een THC-gehalte van maximaal 0,2%', por haya un checklist pa verifica e documentonan cu mester wordo entrega.
Stap 4. Combersacion di orientacion
Si IVA ta considera esaki necesario, un combersacion lo wordo planifica cu e solicitante. Durante e combersacion aki, e peticion, e procesonan di e negoshi, e actividadnan di warda y distribui e remedi, y e rekisitonan pa un permiso lo por wordo discuti.
Stap 5. Prome bishita di inspeccion
Si e evaluacion di e documentonan ta mustra cu e peticion tin suficiente base pa sigui cu e proceso, IVA lo haci un bishita di inspeccion na e localidadnan unda ta warda y distribui e productonan. Durante e bishita, lo wordo evalua si e actividadnan di warda y distribuicion ta cumpli cu e guianan aplicabel di Good Distribution Practices (GDP) y Good Storage Practices (GSP) y otro rekisitonan relevante.
Stap 6. Rapport preliminario
E resultado y observacionnan di e inspeccion ta wordo registra den un rapport preliminario. E rapport aki ta wordo manda pa e solicitante pa dun'e un oportunidad pa indica si eventualmente tin erornan factual den e rapport.
Stap 7. Rapport definitivo y plan di accion
Despues di procesa eventualmente comentario di e solicitante, e rapport di inspeccion ta wordo finalisa. Si IVA a identifica deficiencianan durante e prome bishita, IVA por pidi e solicitante pa prepara un plan di accion unda ta describi e medidanan corectivo.
Stap 8. Ehecucion di medidanan corectivo
E solicitante ta implementa e medidanan di mehoracion cu a wordo acorda y ta informa IVA tocante e medidanan tuma y e manera cu nan a wordo implementa.
Stap 9. Re-inspeccion
Si IVA ta considera esaki necesario, un otro inspeccion lo wordo haci pa determina si e deficiencianan a wordo coregi di manera adecuado.
Stap 10. Rapport final
E resultado di e inspeccion ta wordo registra den un rapport. E solicitante ta haya oportunidad pa indica si eventualmente tin erornan factual. Siguientemente, e rapport ta wordo finalisa.
Stap 11. Conseho na e minister concerni
Basa riba e file completo, e documentonan entrega, e bishitanan di inspeccion y e rapport final, IVA ta duna un conseho motiva na e minister encarga cu Salud Publico tocante e peticion pa permiso.
Stap 12. Decision final
Teniendo e conseho di IVA na cuenta, minister ta tuma un decision tocante e peticion pa permiso. E solicitante ta wordo informa por escrito tocante e decision cu a wordo tuma.
Bo tin pregunta tocante e proceso aki? Tuma contacto cu nos telefonicamente of via: inspectiegeneesmiddelen@iva.aw
